Járnkarl punktur Com

Já skítt er það, ekki einu sinni fullt á Laugaveginn.  Dýrt var það en það verður líka dýrt í hálfkarlinn sem verður helgina áður.  Miðað við ástandið á öxlinni held ég að það sé gáfulegra að skokka Laugaveginn og gera það nokkuð skammlaust en fara að lenda í vandræðum í sundlauginni.  Krafturinn er lítill en verkurinn vegur það alveg upp.  Í kvöld missti ég svo lóð á mig þegar öxlin gaf sig og þá finnst mér orðið nóg.

Nú er ég með öxlina í tjóni og lærið sem ég ætlaði að nota til jafns við hitt lærið á morgun til að koma mér í mark á sub 40 í 10km hlaupi er hnjaskað eftir handlóðið.  Mæti nú og sé til hvort ég get ekki hlaupið þetta eitthvað til fyrir startið nú annars er þetta bara af.  Vonandi verður gott veður svo maður geti sólað sig soldið í sjónum og pottinum á eftir.

Amen

Eftir ansi langa en skemmtilega helgi þar sem boðið var upp á skokk um Heiðmörkina, fjögurra tíma pylsurúnt á Þingvelli og hálftíma hlaup á eftir var dagsskipunin, Interval á Kópavogsvelli.  Samkvæmt plani var boðið upp á 1×12 mín, 1×9 mín, 6×1 og 6×30 sec.  Stuttar pásur á milli.  Gekk ekkert að koma mér í gang, móður og másandi og bara lélegur eitthvað.  Harkaði samt af mér og tuðaði þetta með Vigni við illan leik.  Hresstist nú eitthvað þegar á leið og var allur að koma þegar við vorum búnir.  Þá var krafturinn að mestu búinn líka þannig að ekki var samræmið mikið hjá mér.

Vignir sannfærði mig um að 10 km sub 40 ættu að steinliggja á laugardaginn og er það gott.  Ég trúi honum og því verður þetta alveg ljómandi.  Sjór á eftir og svo pottur.  Algjör snilld.  Mæli með bakkelsi með í pottinn, það er líka gott.

ÍR skokkararnir komu á völlin meðan við vorum að vinna okkur upp í hjartaáfall  Tóku nokkrar bunur á vellinum sem ég sá nú ekki hvað voru.  Sigurjón alveg á útopnu væntanlega fyrir hundraðkallinn.  Það verður gaman að fylgjast með því.  Ég vona að ég eigi ekki eftir að detta í þessa ruglu, nóg er nú samt.

Amen

Sumarið komið með skemmtilegum átakaæfingum og keppnum.  Þriðjudagar eru orðnir kraftadagar á hjólinu og læt ég lærin finna rækilega fyrir því á Krýsuvíkurveginum.  Tek þetta tvær pylsur og tékka svo á Englunum og fer jafnvel annan hring til að vera nú viss um að allt sé í lagi hjá þeim blessuðum.  Það hefur ekkert klikkað á þeim bænum hingað til.  Miðvikudagarnir eru svo uppáhalds.  Þá eru sprettæfingar á braut og vá hvað það er gaman.  Gubban alveg upp í kok og maður er alveg í öðrum heimi meðan á stendur.  Frábært.

Fór einn í hádeginu á miðvikudaginn og skellti mér á Kópavogsvöllinn.  Ekkert of hlýtt og nokkur gola en sól og það er það sem skiptir máli.  Eftir fyrstu 4oo metrana fór bolurinn og tók maður restina á grindinni einni.  Var ekki jafn hraður og síðasta miðvikudag með Vigni og hef mataræðið sterklega grunað þar.

Um kvöldið var það svo 7,2 km TT á vegum höfðingjann hjá Bjarti.  Ég byrjaði ansi snemma sem þýðir að ég á ekki góðan tíma eða engan.  Gaf hjarta og sál í þetta og skilaði það mér öðru sæti í mínum aldursflokki, 3 sec á eftir Steini Jóhanns.

Hef verið alveg á öðrum endanum í tímaleysi með allt og hef liðið fyrir það.  Sef ekki nóg og borða ekki nógu góðan mat heldur.  Er allt of eftirlátsamur við mig hvað nammi varðar í stað þess að borða hollt.

Amen

Kópavogsþríþraut númer tvö hjá mér.  Sú fyrsta var í fyrra.  Þá þekkti ég engan, vissi ekkert um þríþraut en hafði farið á námskeið skriðsundi.  Sú keppni varð frekar endasleppt þar sem ég lagði ekki í að mæta.  Ég hafði hjólað nokkur skipti á Ítalanum á Trainer en ekkert úti, var í la la hlaupaformi og gat ekkert í sundi.  Nú ég harkaði af mér fyrir næstu þraut og tók þátt í ólympiskri þríþraut þar sem mér gekk ömurlega, skrokkurinn allur í mínus og annað eftir því.

Þetta var ágætis áminning um að taka sér tak þar sem ég var búinn að skrá mig í Köben þarna.  Fór að æfa með Vigni og kó um helgar og reyndi að gera eitthvað af viti virka daga.  Fór að fylgja plani sem Vignir hafði fundið á Netinu, kíkti á sjúkraþjálfara sem kenndi mér að liðka mig og styrkja bak og rass og eftir ekki mjög langan tíma var ég kominn á flug.  Frábært sumar varð að enn betra hausti í Kaupmannahöfn þar sem ég fór ótrúlega fyrirhafnarlaust í gegnum heilan Járnkarl og í gær endaði ég í fjórða sæti í mínum aldursflokki.  Fjórða sæti þrátt fyrir að þurfa að láta mig renna niður alla síðustu brekkuna og inn á skiptisvæði þar sem keðjan datt af hjá mér.  Daginn áður hafði ég hlaupið rúmlega hálft maraþon á malarstígum með hundinn í bandi!  Það er ekki hægt annað en að vera ánægður með þetta.

Ég er hæst ánægður að “tapa” fyrir mönnum eins og Steini og Gylfa, Guðmund þekki ég ekki.

Mér gengur ekki alveg nógu vel með öxlina.  Er endalaust með verki í henni og nú bætist viðbeinið við.  Sólveig sjúkra segir að ég megi alveg búast við að þurfa að láta taka af því, það sé ekki óalgengt eftir aðgerð eins og mína.  Ég er nú ekki alveg til í meira svona stuð.  Næst verða tvö rifbein tekin og ég verð eins og Cher í laginu.

Amen

Byrjaði fínt.  Vormaraþonið og ég hálfur.  Er búið að langa lengi að fara undir 1:30  í hálfu en hef ekki haft tækifæri til þess.  Núna var tækifærið og það var nýtt!  Hitti Einar Júl og ákvað að hlaupa með honum og hans hóp þar sem markmiðið var það sama og hjá mér.  Fallegur sumarmorgunn, talsverð snjókoma en ekki mjög kalt og logn.  Alveg brill.  Startað og yfir markið kom ég svo einum klukkutíma og rúmum 27 mínútum síðar.  Bloody brilliant.  Fannst þetta ekkert mál en hefði viljað hafa aðeins meira gel þar sem kvöldmaturinn var rýr og morgunmaturinn Cocoa Puffs.  Hefur virkað fínt hingað til en dugir ekki lengur.

Hef síðan verið í alveg ferlega góðu formi.  Hlaupið hádegishlaup á þriðjudegi á hlýrabol og stuttbuxum, fengið mér tvær Krýsuvíkurpylsur og heilsað upp á Englana á Sneiðinni, tekið þátt í mínu fyrsta TT og tekið rúnt um bæinn á henni.  Fyrir þá sem ekki vita er Sneiðin Cannondale Slice HiMod hjólið mitt.  Frábært hjól og þótt Ítalinn hafi verið góður þá er þetta svo allt, allt öðruvísi að það er bara… tja frábært.  Fannst ég hefði átt að gera betur en var með sviða í lærum eftir nokkuð snarpar æfingar undanfarið og mögulega einhverja ísetu eftir Vorþonið en það er nú ekki víst.

Hondan fékk lit á gjarðirnar.  Duftaði þær hjá félugunum í duft.is og er það svona líka glimrandi flott.  Bjarni Þór og Steini Nýherja hjálpuðu mér alveg helling við þetta bras enda ég algjör byrjandi í svona málum.  Þeir eru aftur á móti drulluflottir og miklir heiðursmenn.

Aftur er ég farinn að finna til smá þreytu.  Er ekkert að æfa neitt óskaplega þannig að eitthvað þarf ég að gera í hvíldarmálum og auðvitað næringunni, klassískt alveg.  Er hangandi á fótum fram til og jafnvel yfir miðnætti á hverjum degi og er svo vaknaður klukkan sjö.  Finnst ég vera að horast allur og er alls ekki sáttur við það.  Langar að reyna að koma að allavega einni lyftingaæfingu í viðbót og splæsa þá í bekk og dedd.  Spurning þó með deddið og fótaþreytu.

Amen

Ó já og ég farinn að skrattast úti.  Þriðjudagshlaupið eldsnemma upp að Reykjum og svona einhver þvælingur.  Var of fljótur þannig að ég hljóp nokkra hringi á hlaupabrautinn við Varmá.  Rosalega er gaman að fara aftur út.  Einna helst að það sé mál að halda hraðanum niðri og þá púlsinum líka.  Hjólaæfing kvöldsins var svo á fjallahjólinu Ólafi.  Fór kringum Úlfarsfell og þvældist aðeins.  Mjög gaman. 

 Tempo æfingin á miðvikudaginn svona líka vel heppnuð.  13,5 km á klukkutíma og smotterí, púlsinn á sínum stað og allt hið besta.  Veit að ef ég hefði borðað af einhverju viti um daginn hefði ég verið hraðari.  Ég á það bara inni.

Fór svo það sem mér fannst langt í gærkvöldi.  Kópavogurinn, Kársnesið, Fossvogur og svo heim.  Náði 36 km í rigningu og nokkrum blæstri.  Ekki alveg sáttur með skiptinguna á hjólinu en ég læri bara að stilla þetta sjálfur.  Sama með pedalana, ég var allt of laus á þeim.

Í dag fór ég svo bara tvisvar í gymmið.  Réri 5 km á tæplega 20 mínútum sem mér fannst bara gott.  Smá lóðarí og í vinnuna á hundrað.  Fór svo bara aftur núna í kvöld og þá til að taka soldið á bakið, axlaræfingarnar, kvið og svo frábærar teygjur.

Finnst ég vera að grennast full mikið en kannski er það bara tímabundið núna meðan ég er að bæta svona í.

Öxlin hefur verið þokkaleg.  Geri eins og fyrir mig er lagt.  Léttar æfingar og teygjur.  Frekar vont að liggja á henni en flest annað er að koma til.

Helgin verður væntanlega viðburðarík.  Langt hlaup á morgun og svo samhjól á sunnudaginn.  Það er að vísu ekki nema tveir tímar þannig að ég verð að finna mér eitthvað til dundurs til að ná í skipulagða æfingu dagsins.

Jæja

Þokkaleg vika æfingalega séð þó ég sé auðvitað að sleppa frekar billega þar sem ég syndi ekkert.  Tek kannski nokkra hringi í heita pottinum en annað er það nú ekki. 

Hlaup og hjól ganga vel finnst mér.  Lappirnar í góðu standi og mér gengur bærilega að halda mig við viðmiðin á púls.  Sólveig er svo jákvæð á bata að hún leyfði mér byrja í lóðunum og hvatti mig til að róa, eða ég held hún hafi hvatt mig til þess.  Jú, það hlýtur að vera.  Merkilegt að ég hef oft róið í róðravélum og alltaf með einhverjum djöfulgang en núna settist ég bara við og réri og réri eins og skólastrákur í Oxford.  Tók vel á en bara á réttum stöðum, fótum!

Fór með Ólaf (nýja Specialized hjólið) til Corinnu á laugardaginn og fór svo með henni dúndur hring í Heiðmörkina og eitthvað sem ég veit ekkert hvað var.  Hún sagði mér einhverntímann að við værum við Helgafellið en það var svo mikil þoka að ég sá ekki neitt.  Hrikalega skemmtilegt að fara svona á fjallahjóli, maður verður bara eins og krakki að leika sér.  Tók merkilega í og geri ég alveg eins ráð fyrir að næsta hjólaæfing verði tekin á Ólafi en ekki á þrekhjóli.

Trainerinn minn er sennilega bara ónýtur.  Helvítis rúllan er orðin eins og sandpappír og var ég að kíkja eftir öðrum á ebay áðan þegar ég ákvað að reyna að koma mér bara út.  Verst að geta ekki sett aðeins grófari dekk undir Ítalann, þá færi ég bara út á honum.  Hvorugur racerinn leyfir hins vegar stærri dekk.

Sunnudagsbrickinn var undarlega erfiður.  Þurfti að stoppa nokkrum sínum og strekkja aðeins á mér.  Vorum bara fjórir en það var fínt hjá okkur.  Horfðum á Jón Pál og svo á  Bruce Willis eiga stórleik í einni Die Hard myndinni.  Við Oddur renndum okkur svo útfyrir í hlaupið.  Frábært veður og algjört æði að hlaupa loksins úti.  Hljóp reyndar rólegheitahlaup með Corinnu á afmælisdaginn hennar en þá var ekki komið svona gott færi eins og núna.

Það er voða gír á mér núna en ég hlýt að jafna mig á því og detta niðrí sömu leti og venjulega.

Amen

Mér finnst ég alltaf vera að byrja upp á nýtt í þessu sundbrölti mínu.  Er varla kominn í gang þegar ég lendi í einhverju rugli og þarf að taka mér langa pásu.  Núna er ég búinn að vera stopp í tvo mánuði og rúmlega það.  Fór til að prófa í dag og gekk vægt sagt ekki vel.  Synti 300 metra og hætti þá.  Vil ekki taka neina sénsa á þessu nóg er nú samt.

Var fínn í dag þrátt fyrir æfingu gærdagsins þó svo ég hafi verið þreyttur í morgun.  Sjálfsagt fór ég bara seint að sofa.  Alltof margt sem truflar æfingar og undirbúning.  Þarf eitthvað að greiða úr málum og halda áfram af fullum krafti.  Auðveldara í að fara en úr að komast.  Hurmpf.

Hef ekki enn farið á fjallahjólið sérstaka enda ekki verið mikill tími til aflögu.  Er ekki á nagladekkjum og því óhægt um vik að hjóla í hálkunni.

Amen

Brick er æfing þar sem hlaupið er beint eftir hjól.  Samkvæmt Mark Allen eigum við ekki að láta líða meira en 15 mín. á milli og stóðst það hjá okkur.

Mættum 7, Siggi Sig, Oddur, Vignir, Maggi R, Hávar, Ásdís og ég í World Class Mosó í morgun.  Hjóluðum í þrjá tíma og styttum okkur stundir með skemmtilegheitum, videoglápi og góðum félagsskap.  Nýja hjólið ferlega fínt og hnakkurinn sem ég hélt að yrði eins og prik kom skemmtilega á óvart.  Enga vitleysu, ég er ansi sviðinn í klofinu þrátt fyrir þennan fína hnakk og góða slummu af Butt-R.

Vatn, kók og Powerade, 2 bananar, epli, orkustöng og eitt gel og ég kom jafn þungur/léttur af hjólinu og þegar ég byrjaði.  Verður að teljast gott.

Skórnir og nýr bolur og svo hlaupið af stað á brettinu.  Fór fljótlega á pace 4,26 en endaði svo á tæplega 5 eftir þessar 30 mínútur.  Nokkuð sáttur við mig.  Fórum svo í gufuna þar sem ég notaði restina af mentholinu sem ég fékk hjá Jóni Ágústi við nokkurn fögnuð.  Mentholið er svo dásamlegt að maður má velja það sem maður vill að það geri gott fyrir mann.  Mjög hentugt, næstum eins og að fara til miðils.  Kældum okkur í snjónum og brunuðum svo aftur í gufuna og er ég með því búin að fá mér nokkurs konar aflátsbréf á allar bólgur í einhvern tíma.

Nokkrar myndir voru teknar, Vignir mætti með nýju græjuna og tók smá vídeó þannig að þessi æfing er vel skrásett.  Myndirnar eru hérna einhversstaðar á síðunni.

Góðar stundir.